تقدم الممثل المصري أحمد السقا للاعتذار من الفنان المصري تامر حسني، وذلك عبر صفحته على أحد مواقع التواصل الإجتماعي بعد الخلاف الذي حدث بينهما مؤخراً.
وكتب أحمد السقا عبر صفحته الخاصة على الفيسبوك:"رساله الى صديق عزيز، صديقي وأخي العزيز تامر حسنى ..أنت عارف اللى بينى وبينك عيش وملح وحاجات كتير....قد أكون اخطأت أني اتكلمت ف الموضوع ع الهوا ولكن يعلم الله كم كنت مجروحا وكم كنت حزيناً .. مش هاطول عليك أكتر من كده ولو أنا رعلت شويه وأنت شويه نبقى خالصين يا عم...تامر حسنى احنا اللى بينا كتير ماتزعلش يا عم وحقك عليه...وميعادنا الحفله اللى جايه".
وجاء ذلك بعد تصريحات السقا ضمن برنامج "السيرة" مع الإعلامية وفاء الكيلاني عندما وجهت له سؤال :"امتى آخر مرة كنت فاكر إن حد أخوك وطلع مش أخوك؟" ليرد عليها بالقول: "أنتِ عارفة إني بتكسف ومش هقول، لكن المرة دي هقول، أنا في حد زعلان منه وحتى الآن مقولتلوش، أنا زعلان من تامر حسني، أنا بحب تامر جدا ولو مش بحبه مش هزعل منه، زعلان منه عشان هو في فيلم (الفلوس) كلمني وقالي إنه عايزني أعمل معاه مشهد، وهو الحقيقة كان جاملني في مسلسل (ولد الغلابة)، وبعد ما عملتله المشهد فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده، مرة قالي دول فانز، ومرة قال دول الشركة المنتجة، قولتله أنا معرفش حد منهم يا تامر أنا معرفش غيرك، ودي أثرت عليّا جدا نفسيا وفي شغلي.
وعما إذا كان هذا الموقف أثر على علاقتك بتامر قال السقا:"مش هتأثر.. لو قابلني حاليا وقالي كلمتين حلوين الموضوع هيخلص.. لكن أنا زعلت، لأن أنا لا يمكن أعمل فيه كده، ميصحش كده، وهو كان بإيده يمنع الكلام ده، لكن اللي حصل حصل وأنا مسامحك يا تامر لكن مشاكلك كترت".
ليرد عليه تامر حسني عبر صفحته الخاصة على أحد مواقع التواصل الإجتماعي :"كنت أتمنى انك تكلمني بيني وبينك، ولو كنت زعلان من أي حاجة أو فاهم أي حاجة غلط، لأن الحجات دي لا يمكن تفوتك، وأنا كنت أتمنى مكتبش الكلام دا هنا، بس عشان بعد كلامك في التلفزيون، الجمهور الكريم بقى ليه حق إنه يفهم الصح".
وأضاف: "عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك ان دي اجتهادات صحفية والصورة من تصميم محبين اللي اكيد فرحوا بالخبر اننا مع بعض، حتى أنا مقولتش ان دي الشركة المنتجة، لأنها شركة كبيرة، ولا يمكن تعمل كدا، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة".
وتابع: "أنا شرحتلك دا من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد".
وختم بالقول: "أنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضوا زعلك يعز عليا".